加密貨幣走資賺息BB班(6) --- 保守型存款生息篇（下）

保守型存款生息篇（下）

上一回介紹咗啲存款生息projects係做啲乜，點解會有利息派，點解個利率可以高過銀行。今堂就講吓實際點樣用佢哋，點樣存款落去。

用DApp就要有DApp Browser

仲記得呢張圖嗎？

要用到DApp，首先需要工具，叫DApp Browser。睇返BB班第一堂嘅存款生息簡介圖，DApp Browser就係一個橋樑，一邊駁住加密銀包，一邊連去唔同嘅DApp。因為DApp嘅介面一般都係網頁（對普通用家黎講），所以DApp Browser其實亦即係一個可以連結加密銀包嘅Web Browser。

MetaMask app 截圖

之前我哋喺第二堂裝咗MetaMask，佢就係一個幾常用嘅DApp Browser。如果你係用電腦的話，MetaMask係附加喺Web Browser上面，當你去到DApp網站，有需要時佢就會彈出嚟俾你處理加密貨幣交易。如果你係用手機app的話，你可以click左上角嘅menu，然後有「Browser」功能，俾你上DApp網站進行交易。

而我嘅簡介圖入面亦提到Opera（PC / Android / iOS），佢係我自己好鐘意用嘅Web Browser，而且仲係第一個正式支持加密銀包及DApp嘅主流Browser。只要喺「Settings➡️Crypto Wallet」輸入自己嘅Seed Phase，就可以連結自己嘅銀包。我個人就鐘意用Opera，因為作為Web Browser黎講Opera好用好多，只係有啲DApp唔支持Opera我先要轉返去MetaMask。（有一點要注意，Opera唔需要每次入App掃指紋，而係交易先掃指紋）

Update @ 2021-01-17：感謝網友提醒，Opera 已於 2016 年被中國公司收購，而家係由幾間北京企業共同持有。Opera 原創辦人 Jon Stephenson von Tetzchner 就於 2011 年離開後則另起爐灶，2015 年推出咗 Vivaldi 瀏覽器。Vivaldi主張唔會採集任何用戶資料，可以阻檔網絡跟蹤，同時由於使用Chromium核心編譯網頁，所以又能夠使用各種Chrome plugin。Vivaldi公司100%由員工持有， 令瀏覽器開發唔會受投資者影響，全心實現用戶需要。而家我嘅電腦以及電話已經改用Vivaldi，電腦上面Vivaldi可以安裝MetaMask嚟連結加密銀包，而手機版就未有加密銀包功能，所以電話上就完全用哂MetaMask了。

DeFi存款嘅基本步驟

就正如第三堂介紹買幣有三步曲，要喺DeFi project存款生息大致上都係離不開以下步驟：

1. 連接銀包
2. 開通某一種加密貨幣存款
3. 存入加密貨幣

第一步係話俾個DApp Browser知呢個網站可以連接自己個銀包，第二步就好似去銀行開外幣户口，確認將來要用智能合約處理某一種貨幣嘅存款，而第三步就係建立智能合約實際放加密貨幣入去。第二堂講解區塊鏈交易講過手續費GAS，上面提及嘅第二及第三步都係喺網絡數簿上加一條transaction，所以都係要俾GAS，一般由幾毫至幾蚊美金（視乎以太坊上多唔多人爭住記賬）。

存入加密貨幣之後，就可以隨時返上去個DApp嘅網站睇住自己嘅資產不斷增值，每幾秒就隨住即時派息而增長。DApp網頁上一般都係顯示呢一刻嘅利率，所以最好自己mark低邊日放咗幾多錢入邊個project，以及定期（例如每周）記錄資產嘅價值，等自己可以計返拉匀黎講實際年利率係幾多，睇返每一個平台嘅表現。

實際存款step-by-step

嗱，即係咁，我個人就好懶嘅，去到啲要一步一步捉住隻手教嘅位，就當然係交俾最佳助教----鴨仔DuckDuckGo啦！

1. Compound

圖文教學：How to Earn Interest and Borrow Ethereum Assets by Calvin Liu

影片教學：

2. dYdX

圖文教學：Getting Started With dYdX — Lending by Everett Hu

文字教學：dYdX FAQ - Lending on dYdX

3. Aave

圖文教學：Zero to Hero Guide 2.0 by Isa Kivlighan

影片教學：

存款應該點樣分配？

之前講過，Compound、dYdX及Aave三個DApp各自有唔同嘅利率，咁應該點樣分配？呢樣嘢真係無絕對，我個人就傾重dYdX，但分配比例好視乎你對於幾個平台嘅回報及風險點睇。例如而家存款落Compound會每日派管治幣COMP，其實計埋COMP嘅價值回報隨時高過dYdX，我而家嘅分配可能唔係最好。

要睇住三個DApp嘅利率走勢，又想方便自己將啲錢喺三個DApp之間做轉換，我用咗 DeFi Saver - Smart Saving。佢係建基於 MakerDAO 嘅智能銀包，只要係DAI嘅存款，就可以一click喺幾個DApp之間直接過數，唔洗轉出再轉入。唔好處係呢種智能合約嘅手續費GAS會比較貴，而家GAS價算係高位，我建議大家如果GAS價回落到50Gwei以下嘅話可以考慮試吓。（其實 DeFi Saver 仲可以做一啲中風險嘅動作，例如用自己嘅DAI存款黎借更多DAI再存返入去，谷大自己嘅存款，不過要計埋借錢嘅利息，呢啲喺BB班就唔講住啦。）

DeFi Saver - Smart Saving 截圖，會顯示唔同DApp當下嘅利率，過去一個月嘅平均利率以及走勢圖。佢亦會用當下嘅利率去推算一星期、一個月及一年嘅利息。
（上面條bar見到我嘅存款分配比例）

可能你會問，有無人整啲DApp係會自動去搵最好利率嘅存款，自動尋找最高嘅回報？尤其是自動捕捉嗰啲利率升到幾十厘嘅機遇？答案係有嘅，例如最近喺DeFi引起一股狂熱嘅yEarn。我都有小小地嘗試吓，但由於呢個project實在太初步，個介面又非常簡陋，我唔推薦BB班嘅你去嘗試。呢啲類似基金嘅嘢風險會比一般存款高，而且賺到錢提款時要扣佣金，我遲下有機會再向大家介紹吧。

簡單嚟講，如果大家睇完呢個BB班系列之後心郁郁，想安全實地了解DeFi世界嘅話，我會建議大家先由Compound入手，做DAI或USDC存款，再考慮吓試唔試dYdX及Aave。如果將來GAS價回來，DeFi Saver都係一個管理DAI存款唔錯嘅工具。

記得睇埋最終回！

大家唔好急住講bye bye，呢個BB班系列未完㗎！下一當埋尾再吹吓水，畢業前提返大家一啲必須要記住嘅事，記得睇埋最後一篇！

進度	項目	內容
	1	準備功夫
✅	1.1	咩嘢係key同address
✅	1.2	開找換店account
✅	1.3	開加密銀包
	2	由港幣換加密貨幣
✅	2.1	認識買幣流程
✅	2.2	ETH以及數簿記帳
✅	2.3	用 wallet app 查閱銀包
✅	2.4	介紹幾種加密貨幣
✅	2.5	介紹找換店/交易所
	3	存款生息
✅	3.1	認識 DApp
✅	3.2	介紹幾種基礎存款生息渠道
✅	3.3	嘗試用 DApp browser 存款
☢️	3.4	介紹幾種進階存款生息渠道
	4	BB班畢業禮
	4.1	檢視資產安全措施
	4.2	認識硬件加密銀包
🙅	4.3	認識其他投資渠道
	4.4	其他加密貨幣資訊拾遺

P.S.1 Item3.4結果只係輕輕帶過，將來機會再寫。
P.S.2 Item4.3都係取消了，要更多篇幅去介紹。
P.S.3 加多一項Item4.4，下回補返一堆豆知識。

---

Posted from my blog with SteemPress : https://hkxforce.net/wordpress/8000

---