穩定幣及找換店篇

上一堂講咗點樣買加密貨幣，以及初步認識咗 ETH 以太坊。對於保守嘅投資者嚟講，ETH 嘅價格比較波動，未必係投資生息嘅好選擇。今次我哋會認識一下穩定幣，一啲同美金有穩定匯率嘅加密貨幣。

穩定幣點穩定法？

穩定幣（stablecoin）泛指同傳統貨幣有穩定兌換率嘅加密貨幣，一般都係同美金掛鈎，但唔同嘅穩定幣會用唔同嘅方法黎達到呢個目標。喺選擇某一款投資穩定幣之前，一定要了解佢背後係點運作，睇吓係咪真係有堅實嘅基礎去支撐佢嘅兌換率。下面我介紹嘅兩款，都係比較目前普遍認為比較可信嘅穩定幣。

以100%銀行存款作保證嘅USDC

最容易理解、又有非常穩固基礎嘅，莫過於USDC。由支付平台 Circle 及加密貨幣交易所 CoinBase 牽頭，組成 Centre 組織，發行呢隻加密貨幣。佢哋個運作原則好straight forward：你俾一蚊美金佢哋去買一蚊USDC，佢哋就將嗰一蚊美金存落美國嘅銀行户口。你俾一蚊USDC佢哋嚟換返美金，佢哋就銀行提款俾返一蚊美金你。

即係話，市面上流通嘅USDC都係有100%嘅美金存款支撐，而且佢哋仲個個月公開核數報告。USDC嘅程式碼亦係開放 Open Source，任何人都可以檢查有無舞弊或漏洞。呢啲做法相對於其他較早期推出嘅穩定幣更開放透明，令USDC越黎越受歡迎。可以講，如你信任美國嘅金融體系，以及相信美國政府唔會貿貿然打壓加密貨幣，咁USDC係非常可靠。如果想知多啲，可以睇吓以下資料：

• Understanding USDC And Why It’s Revolutionary
• Centre - Whitepaper
• Major Update to USD Coin (USDC) Released Today Advancing Digital Dollar Stablecoin Usability & Security as Market Cap Hits 1.4 Billion

以複雜抵押及供求機制產生嘅DAI

上一段暗示咗，USDC其實有一個風險位，就係支撐匯率嘅係存放喺銀行嘅美金，若然美國政府決意對付加密貨幣，凍結coinbase嘅存款，咁對於USDC將會係致命嘅打擊。有無方法既唔洗依賴傳統金融體制，又可以維持穩定嘅匯價呢？咁就要認識吓由MakerDAO發起嘅DAI，嗱有啲複雜㗎，坐穩啦。

DAI幣係點黎呢？MakerDAO就好似一個DAI嘅存庫，任何人都可以去MakerDAO建立智能合約CDP，透過抵押自己嘅資產（例如ETH）借出DAI。而為咗維持DAI嘅穩定匯價，做CDP嘅人要留有保險水位，一般黎講價值$100美金嘅ETH只可以借到33個DAI。咁就算ETH價上上落落，都仲可以支持DAI兌美金1:1。若然ETH價跌到接近$33美金，就會自動贖回DAI，以保障DAI嘅匯價。

咁點解啲人要做CDP？就係因為DAI可以產生利息。咁邊個決定利率呢？呢度無央行，靠嘅係網絡社群。MakerDAO同時發行另一種加密貨幣MKR，任何人只要買咗MKR，就可以參與管理DAI，提出議案交由整個社群投票，例如利率增減，又或者接受新嘅加密貨幣做CDP。Maker社群仲有一個任務，就係當遇上DAI架構無法處理嘅危機時，可以動議撳緊急掣啟動全盤結算（Global Settlement），停止DAI及CDP運作，以DAI兌美元1:1匯率將DAI換返哂做原本抵押嘅資產。

DAI唔似得USDC咁有100%存款支撐，點樣維持DAI嘅匯價？靠嘅主要係市場調節，有少少似港幣聯繫匯率。當DAI價跌穿$1美元，咁以前喺高位借咗DAI嘅人就可以喺低位買入然後還舊數，需求上升自自然然會推高返DAI價，相反亦係類似。當市場調節嘅力度都唔夠，就會再觸發自動調節機制TRFM（Target Rate Feedback Mechanism），透過每十五分鐘調節CDP嘅DAI目標價格，改變開立CDP嘅成本及手持DAI嘅回報，黎調節DAI嘅供求以及匯價。

以上描述其實真係非常簡化，當你了解得越深入，就會睇得出我簡化完係有幾唔準。但再寫落去嘅話我諗大家真係會TLDR，所以真係有興趣嘅朋友就自己參詳吓以下資料啦：

• What is DAI, and how does it work?
• Maker for Dummies: A Plain English Explanation of the Dai Stablecoin
• The Target Rate Feedback Mechanism: An Introduction
• The Maker Protocol: MakerDAO's Multi-Collateral Dai (MCD) System

揀USDC定DAI？

作為現時最受歡迎嘅兩種穩定幣，究竟選擇USDC定係DAI？我嘅答案係……兩隻都買，分散風險。就喺呢篇文見街前，正好有兩篇新聞令我加強對呢兩隻加密貨幣嘅信心。

DAI兌美元匯價，2020-09-22截圖

首先係DAI，其實我自己比較推崇DAI嘅理念，但近呢兩個月我都唔敢建議人買DAI住。事關最近由於DeFi非常熾熱，DAI嘅供應追唔上需求，兌美金嘅兌換價升穿1:1.04。Maker社群不斷討論點樣令DAI價推落返去1:1.01，但不停被詬病講得太多、執行太慢（民主決策嘅通病），Maker論壇上有唔少人自嘲社群只係喺程序入面兜圈，睇住DAI價脫離正軌而無所作為。

但去到九月十五號兌換價升上1:1.05甚至1:1.06，社群終於通過緊急動議，透過修改穩定幣抵押比率下限黎「印銀紙」，平衡返DAI嘅供求，成功令DAI匯價返到去1.01-1.02美元水平。呢次事件對Maker社群係幾值得回顧嘅考驗，有唔少問題可以再傾下點跟進同改善。亦反映出Maker社群由於絕大部份人都係DAI持有者，去到重要時刻殺到埋身大家都會齊心嗱嗱聲搞掂啲問題。

之後到USDC，美國貨幣監理局（OCC）喺九月廿二號首次發出關於穩定幣嘅聲明需，表示對於USDC呢類以100%存款支撐穩定匯價嘅加密貨幣，持牌銀行可以正式作為穩定幣嘅支撐，作為背後提供法定貨幣現金儲備嘅實體金融機構。呢個聲明為呢類穩定幣打咗一支強心針，保證佢哋嘅銀行存款獲得政府認可。

同時，美國證券交易委員會（SEC）的員工發表聯合聲明，就住OCC上面嘅聲明，進一步解釋佢哋嘅立場。過去曾經有穩定幣因為特定嘅運作機制而被歸類為證券，最終因為太多運作上嘅限制而要終止計劃。今次SEC員工表示OCC所提及嘅穩定幣（有100%存款支撐），對SEC嚟講唔一定被歸類為證券，要視乎每一個個案嘅作出分析。SEC員工表示歡迎穩定幣組織聯絡佢哋，會協助穩定幣確保自己符合相關法規，並且喺過程中維持唔採取行動嘅立場（'no action' position）。呢樣亦係對穩定幣又打咗一支強心針。

註：其實仲有其他類似USDC嘅穩定幣，例如同樣係同美元掛鈎以及有每月公開核數報告嘅TUSD以及PAX。上文選擇推介USDC，係因為如果以存款生息為目標的話，USDC比較多project支持。

其他加密貨幣找換店（交易所）

第二回介紹過香港嘅加密貨幣找換店MyEthShop，佢嘅介面比較簡單易明，可以直接由香港戶口過數，而且有咩嘢問題都可以直接Whatsapp問佢，係香港人接觸加密貨幣幾好嘅嘢入門途徑。不過無論係買啲乜嘢，最重要都係格價格價再格價，加密貨幣都係一樣。

「穩定幣唔係兌美元1:1㗎咩？仲格啲乜？」以USDC為例，1:1係要直接過數去佢哋嘅美國户口，對我哋嚟講即係要做國際電匯去美國。如果你唔熟點做電匯，又或者嫌電匯太慢，就要搵吓其他方法，例如MyEthShop可以俾你直接用港幣買加密貨幣，又或者其他一啲可以用碌卡買幣嘅交易所。至於DAI呢種匯價有上落嘅穩定幣，就更加要格價。下面會介紹兩間我常用嘅俾大家，開户及身份認證流程同MyEthShop差唔多。

利申：大家click呢個網頁嘅link去開户口，然後又達到一定交易金額條件，我同你都會有少少回贈。

1. Crypto.com

申請網址：https://crypto.com/app/uw579qgf3r
Referral Code: uw579qgf3r (以此介紹碼開Crypto.com VISA可獲USD $50回贈)

好處：免信用卡附加費及可以港幣帳，買USDC方便
缺點：買DAI每次只限買$200 DAI
買幣流程：信用卡買幣➡️Withdraw去自己Wallet

呢間公司之前叫MCO，因為出咗張 MCO VISA card 所以已經有好多網站報導過。不過我唔係講佢張咭（因為我自己都無用），而係講用佢個交易平台黎買幣。事關以往網上好多平台都要收信用卡附加費，而且碌卡係計美元，銀行又要再收我哋手續費，變相我哋差唔多要俾多5%（甚至更多），非常唔抵。

Crypto.com幾個月前分别取消信用卡附加費以及碌卡可以計港幣，呢兩點幫我哋慳到好多。記得留意自己張信用咭嘅服務收費，有無一項叫海外港幣簽帳收費（間間銀行叫法唔同，最好就打去問下）。因為呢啲網站通常都係海外註冊，銀行會歸類為海外簽帳。如果你張信用卡要收呢種附加費，就唔好用佢黎買加密貨幣啦。

渣打收費條款 (2020-09-16截圖)

2. Wirex

申請網址：https://wirexapp.com/r/hkxforce
（以此連結開户，買入$100美元加密貨幣以及第一次去鋪頭碌卡會有$5回贈）
開户說明：How to create a Wirex account
申請信用咭：How to order a Wirex card

好處：免信用卡附加費以及可以港幣簽帳，買DAI方便
缺點：無法買入USDC
買幣流程：信用卡增值港幣➡️買幣➡️Withdraw去自己Wallet

另一個要介紹嘅就係 Wirex，嘅賣點都係可以買賣加密貨幣以及有信用卡。佢嘅好處係兌換率，買DAI有時候比其他交易平台抵好多，所以記得check吓佢個價。以前佢可以每日去提款機拎約$2000港幣（$400星加坡紙），而家改為每月頭$2000免手續費，之後要收2%，所以用佢黎換返港幣就唔係幾抵了（不過亦可以換做港幣之後直接日常生活碌卡消費）。

有樣嘢記得要做，就係喺個app入面將港幣HKD放喺前面（唔計WXT，呢個無得郁嘅），因為當你去碌卡時，邊一種法定貨幣喺最前，就會扣邊一隻。如果美元喺最前，就會扣美元。

即係咁樣，WXT之後就要係HKD

大家可以先觀察吓，比較吓MyEthShop、Crypto.com以及Wirex嘅價格差異，等到有你嘅心水價先買。千祈唔好急，千祈唔好見人買就買。你可以睇埋之後嗰兩堂，了解吓啲存款生息projects係做乜，等待好價錢再出擊。

我哋又睇吓個進度先：

進度	項目	內容
	1	準備功夫
✅	1.1	咩嘢係key同address
✅	1.2	開找換店account
✅	1.3	開加密銀包
	2	由港幣換加密貨幣
✅	2.1	認識買幣流程
✅	2.2	ETH以及數簿記帳
✅	2.3	用 wallet app 查閱銀包
✅	2.4	介紹幾種加密貨幣
✅	2.5	介紹找換店/交易所
	3	存款生息
	3.1	認識 DApp
	3.2	介紹幾種基礎存款生息渠道
	3.3	嘗試用 DApp browser 存款
	3.4	介紹幾種進階存款生息渠道
	4	BB班畢業禮
	4.1	檢視資產安全措施
	4.2	認識硬件加密銀包
	4.3	認識其他投資渠道

---

Posted from my blog with SteemPress : https://hkxforce.net/wordpress/7763

---