Ruhul Fata

LEUPAH THAT MANYANG
GUNOENG SEULAWAH
RUPAJIH LEUMAH
SAMPOE UBANDA

DI YUP GUNOENG NYAN
NA SABOEH DAYAH
TEUMPAT KEU NEUBAH
'ALEM 'ULAMA

TEUMPAT MEUNUNTUT
BANDUM THALABAH
RATA DAERAH
KEUNAN TROEH TEUKA

MEURUNOE TAUHID
NGOEN HUKOEM FIQAH
ILMEE BALAGHAH
IKOET SEUREUTA

NGOEN TAFSIR QUR'AN
BANDUM GEUSURAH
KITAB MUSHTHALLAH
NYAN PIH GEUBACA

NAK BEK MEU LENCENG
'AMAL 'IBADAH
RHOET LAM BIDEU'AH
YANG SEUSAT NYATA

'OEH TE TA KALOEN
MEULEUMPAH CEUDAH
KEUNOENG KUPIYAH
MEUPINGGANG IJA

NYAN SABOEH DAYAH
NYANG ABU KEUBAH
NAMA MEUTUWAH
SIRUHUL FATA

WAHEE EU TUNGKU
DUM TEUNTRA ALLAH
GATA BEK GUNDAH
TUNTOET AGAMA

BEK TA TEM PATEH
SI 'AWAM PEUGAH
TINGGAI LAM DAYAH
MASA DEPAN HANA