HUDEP LAM RANTO

![image](

Alah wee lah loen, Keutapang pasie
Timoh meuriti, Cabeung meu-umphoe
Salamalaikom, Kawoem fanz seuni
Saleum uloen bri, Keunoe loen pasoe

Si bareh naskah, Loen ujoe isi
Lam madah syah'i, Loen tuleh jaroe
Meunyoe na sajak, Yang hana tari
Cuba peumeuri, Peubutoi sigoe

Saboh meunalah, Loen ujoe rawi
Kisah seundiri, Didalam rantoe
Kadang ciet han pah, Daweut kabeh li
Beu neu maklumi, Wahee rakan droe

Hai kru seumangat, Lamat lam Negri
Oeh musem semi, Kayee meugantoe
Luroh oe'n tuha, Laya keumbali
Leupi ciet sakri, Malam ngon uroe

Hudep lam rantoe, Wahee eo Ummi
Seudeh han sakri, Jioh ngon Nanggroe
Teutapi kamoe, Ka meunikmati
Tan meupaduli, Adak deuk-deuk troe

Tan pat meu lakee, Peu manja diri
Hana saudari, Sinoe meusidroe
Han pat ceurita, Tabue ngon basi
Khep deungon wangi, Kamoe coem keudro

Meutan soe siboe, Tan soe peugot ie
Tan soe boh kupi, Jijok bak jaroe
pue loem lagee nyoe, Lam buluen suci
Hawa keu Kanji, Suah woet keudroe

Kadang keurija, Peutang ngon pagi
Oh wate gaji, Mando han meuhoe
Suah kamoe preh, Meuhari-hari
Kadang meukupi, Hana ngon meubloe

Hudep lam rantoe, Wahee eo Abi
Seunang seukali, Juet loen jak dumhoe
Teutapi kamoe, Jareung na cuti
Sithon seukali, Baroe rhah jaroe

Pue loem ta keurija, Nibak kompeni
Susah seukali, Wahee rakan droe
Tanyoe di atoe, Deungon jaroe wi
Tapi hai akhi, Han kamoe pakoe

Bak pike nasip, Meugrit seukali
Rela di caci, Kamoe tiep uroe
Yang peuteng rupia, Juet kamoe cari
Demi kamoe bi, Keu Mak ngon adoe

Jak loen dodi, buju oe'n giri
Angen di Bangi, Jipoet u Johoe
Kon keluh kesah, loen neuk peumeuri
Seukadar seuni, Keunoe loen rampoe

Walaupun beutoi, Yang loen rasa i
Han loen peugah ri, Dak luka asoe
Mangat bek seudeh, Poma ngon Abi
Hana le sangsi, Geu tanyong loen woe

Walau pieh susah, Di lua Negri
Lon som lam hati, Mangat bek bucoe
Supaya seunang, Sanak famili
Oh loen kabari, Haba bak adoe

Bek seudeh hate, Rakan lam Negri
Jie peugah ngeri, Hudep lam rantoe
acie keuh neujak, Neu cie peu pasti
Fakta opini, Neu kaloen keudroe!

Tanyoe beu caroeng, Peu sesuai diri
Juet beraptasi, Hoe yang ta peutoe
Supaya mudah, Bak mita raseuki
Tan soe campuri, Deungon peu kachoe

Do'a bek tuwoe, Lakee bak Rabbi
Niat lam hati, Bek na yang kutoe
Ta pu but suroh, Peu jioh keuji
Khamar ngon judi, Meubek ta pakoe

Bak but meuzina, Bek ta grak gaki
Allah teukeudi, Hudep teuh phang phoe
Tuboh ka kutoe, Hana le suci
Keupu loen arti, Geutanyoe rugoe

Meunyoe di darat, Urueng luem Peunyi
Di laot asi, Kawee Tanggiroe
meunyoe lam hudep, Tuboh teuh suci
Hoe yang rhot gaki, Na urueng pakoe

Di langet jioh, Bintang sep tari
Ceudah han sakri, Meuranjoe-ranjoe
Kasep nyoe dile, Syah'e puisi
Meunyoe tan rapi, Neu tuleh keudroe!

Salam